Qanyare “C/laahi Yuusuf markii la doortay 30.000 oo Ethiopian ayuu dalbaday basle waa loo badiyay”.

Neyrobi, Arbaco, May 14, 2008  Xogta Online

Xildhibaan Maxamed Qanyare Afrax oo kamid ah Xildhibaanada Barlamaanka Soomaaliya ayaa ka hadlay xaalada Soomaaliya iminka ay mareyso.

Xildhibaanka oo isagoo ku sugan magaalada Nairobi ee caasimada Kenya Saxaafada la hadlayay ayaa sheegay in dhibaatada Soomaaliya ay sii jiri doonto, ilaa ay daaqada ka baxeyso DF oo ku tilmaamay mid aan dano dadweyne ka shaqeyneyn.

Qanyare waxa uu sheegay in Madaxweyne Cabdilaahi Yuusuf habeenimadii Nairobi lagu doortay uu codsaday 30.000 oo Askari kuwaaso ka socda dowlada Ethiopia balse loogu badalay ciidamo kor u dhaafaya 70.000 Askari kuwaasoo iminka ku sugan dalka Soomaaliya.

“Cabdilaahi Yuusuf waligeey waan ogaa inuusan dano shacbiyadeed ka shaqeyn doonin, Soomaalida ayayna u taal sidii ay isaga celin lahaayeen hal meelna ugu soo horjeesan lahaayeen” ayuu yiri Qanyare.

Xildhibaanka ayaa sheegay in dhawaan ciidamo uu soo diray Madaxweyne Cabdilaahi Yuusuf ay weerar ku qaadeen guriga uu Baydhaba ku degnaa isla markaana lagu dilay labo kamid ahaa ilaaladiisa.

Waxa uu sheegay in dhibaatada Soomaaliya ka taagan mas’uul ka yahay Madaxweyne Cabdilaahi Yuusuf oo sheegay inuusan aheyn nin qaran balse yahay nin qabiil sida uu hadalka u dhigay.

Mar wax laga weydiiyay aragtidiisa ku aadan shirka kooxaha Soomaalida ugu furmay Jabuuti ayuu yiri “Isbaheysiga looma baahneyn inay Jabuuti tagaan ama shir la yeesheen DF xubnaha ka socda, ilaa dalka laga saaro ciidamada Ethiopian-ka”.

Qanyare waxuu sheegay inuu dadaal xoogan u gali doono sidii dalka loogu bixin lahaa ciidamada Ethiopian-ka oo ku tilmaamay cadaw weerar ku ah jiritaanka ummada Soomaaliyeed.

Si kastaba ha ahaatee, Xil. Qanyare ayaa kamid ah Siyaasiyiinta Soomaalida ee inta badan dhaliila Siyaasada Madaxweyne Cabdilaahi Yuusuf Axmed.

Xogta Online